Aurkezpena

Mikroskopia Analitikoa eta Bereizmen Handikoa Biomedikuntzan Zerbitzua Euskal Herriko Unibertsitateko, (EHU) Ikerkuntzarako Zerbitzu Orokorretako (SGIker) parte da, eta 1997an jarri zuten abian.

Zerbitzuaren xedea honako hau da: lagin biologikoetako egitura mikroskopikoa irudien bidez analizatzeko ekipamendua, laguntza teknikoa eta prestakuntza espezializatua eskaintzea. Zerbitzuak, gainera, EHUko diziplinen irakaskuntzarako sostengua ematen du, halakorik behar izanez gero.

Gaur egun, Zerbitzuak honako tresna hauek ditu: transmisio-mikroskopio elektronikoak (bi), ekortze-mikroskopio elektronikoak (bi), mikroskopio fokukideak (bi) eta fluxu-zitometroa (bat). Bestalde, laginak prestatzeko eta lortutako irudiak prozesatzeko eta analizatzeko tresnak ere baditu.

• Mikroskopia Optiko eta Digitaleko Laborategia
  • Mikroskopia fokukidea, irudien analisi informatizatua, bideomikroskopia,fluoreszentziazko mikroskopia eta kontraste interferentziala.
• Mikroskopia Elektronikoko Laborategia
  • TEM, SEM, STEM, EELS, ultramikrotomia, estaldura metalikoak, puntu kritikora lehortzea, inklusioa erretxinetan eta luzapenak.
• Zitometria Laborategia
  • Fluxu-zitometria.

Zerbitzuko ekipamendua EHUko ikertzaile guztiek erabil dezakete, eta baita beste ikerketa-zentro publiko zein pribatu batzuek ere.